Deuteronomy 12
A Tanga ni Kavurike a Vure Ge Taku
1E Moses i ta tabu i ta maea, “Mu longo kamumu a vinara nga. Mu ramai kamumu na tahuna mu made na malala e BAKOVI DAGI a Vure ne huriki a gare ne mua i ngaru ge habia ne mua. 2Na tahuna mu bolea pali a robo iea, mu ratapile a maka tanga, re huriki a tahona ri kavurike a maka vure ranga na lolo, na kupona, na taruna kai buroro. 3 aMu puka a maka dede ne ria, mu ubimomo a maka butu-kedo na lotu. Mu rungania a hanuna vure ngatavine e Asera ra ni kau na kai, mu bole a maka kira mu tolo a maka hanuna vure ne ria ni kau na kai. Muri i uka ma ni gi luhoi tabu a rane ria na maka tanga nga.4“Na tahuna mu kavurikea e BAKOVI DAGI a Vure ne hita, naha ni ratea a naro ge manga ne huriki a bakovi ri kavurike a maka vure ranga. 5E BAKOVI DAGI ge vulakia tara tanga ge taku kunana pololilo na malala na kabu ne mua, lakea e huriki bara ri valai vona a tanga iea. 6Na tanga iea, mu rata a maka nihabi legelege ne mua, a nihabi gutu-vuro, a maka nihabi ranga. Na tahuna mu veru a maki, mu ru na naguna ge ravulu, a naguna ge taku mu habia na Vure. Ra naguna i taku iea, mu bole lakea na murina tanga ni vasileki. Mu bole tabu ranga nihabi mu ta muholi vona mu gu habi ne BAKOVI DAGI, a maka nihabi mu habi na ningaru ne mua, a maka tuna bulmakau a sipsip a tabua. 7Na tanga iea, na matane BAKOVI DAGI a Vure ne hita, mua turane huriki a kabu ne mua, mu kani mu vivi vona a maka maki kamumu e BAKOVI DAGI i gamai mua vona.
8“Na tahuna mu tahoka a tanga ni kavurike a Vure, naha ni rata a nihabi na tabeke tara. Ngane mu rata mavonga, 9a vuhuna i uka ma mu dili ma vona a malala e BAKOVI DAGI i ngaru ge habia ne mua, mu gu made kamumu vona na nivalemu, mu gu malo. 10Na tahuna mu tulu poloa a naru e Iordan, e BAKOVI DAGI bara i taki mua mu bolea a malala iea mu made vona. Bara i matakari kamumu mua, e huriki a pile i uka ma ri gi valai tabukoi ne mua, bara mu made na nivalemu. 11Na mailo vona na tanga iea mu bole valai a maka maki a taki mua vona pali, ra nihabi gutu-vuro, a maka nihabi ranga, a naguna i taku na maka naguna maki i ravulu, a maki ranga mu ngaru ni habi ne BAKOVI DAGI, a maka nihabi kamumu ne vona ni ta muholi vona ne BAKOVI DAGI. 12Mua, e huriki e tune mua, a vora ne mua, e huriki a Levi ri made na tanga ne mua, mua lobo mu lakea tabukoi ne BAKOVI DAGI a Vure ne mua, mu vivi vona. Mu luhoi kamumu e huriki a Levi ri uka a malala. 13Naha ni ramaia a ningaru ne mua mu gu rata a nihabi gutu-vuro na maka tanga viliha. 14Mu rata a nihabi na tanga ra i takia e BAKOVI DAGI ge vulakia pololilo na malala na kabu ne mua. Na tanga iea kunana mu rata a nihabi gutu-vuro, a maki ranga a vakuku mua vona mu gu rata.
15“Pali i uka ma a hatekakari mua vona ni rabalaki a maka sipsip a bulmakau mu gu kani na hini mu made vona. A maka maki kamumu e BAKOVI DAGI i habi ne mua mu kani, naha ni luhoi lege vona a hini mu matapado o i uka ma mu matapado na matana Vure. Mu kani na maka tabeke viliha mu made vona, i manga a hini mu kani a maka kanirau. 16 bPali naha ni ninu a darane ria. Mu guru vuroki na malala manga a naru. 17Naha ni kani a maki nga na tanga ne mua. Ra naguna i taku na maka naguna maki i ravulu na vit, na vain, na namona oliv, na maka tuna bulmakau a maka sipsip a tabua, a nihabi mu ta muholi vona mu gu habi ne BAKOVI DAGI, a nihabi mu habi na ningaru ne mua, a nihabi ranga. 18Mua turane huriki e tune mua, e huriki a vora bakovi a vora ngatavine, e huriki a Levi ri made na tanga ne mua, mu kani ra maka nihabi nga. Pali mu kani a maka nihabi nga na matane BAKOVI DAGI a Vure ne hita, na tanga ge taku kunana i vulakia ne vona ni vasileki. Mu kani na tanga iea, mu vivi vona a maka maki mu leho hateka mu vakabele. 19Na parava vakaroro na tahuna mu tababana ni made vona a malala iea, naha ni matataro ni tuhori e huriki a Levi.
20“Muri ma, na tahuna e BAKOVI DAGI i ratea a robo ne mua i dagi hateka, i manga a ngava i ta muholi vona ge rata, mu kani a sipsip a bulmakau na parava mu ngaru ni kani a sipsip a bulmakau vona. 21A tanga ni vasileki ge basi, mu rata manga a hini a taki mua vona. Mu rabalakia a bulmakau, a sipsip, mu kani na tabeke ne mua. Mu rata mavonga na parava mu ngaru. 22Naha ni loho lege lae vona a viri i matapado o i muto, ge kani a sipsip a bulmakau. 23 cPali naha ni ninu a darana sipsip a bulmakau. A dara a vuhuna nimahuri. Naha ni kani a bobona sipsip a bulmakau i turana a dara. 24Naha ni ninu a darana kania. Mu guru vuroki na malala manga a naru. 25Naha ni ninu a darana sipsip a bulmakau, lakea a maka maki bara i bele kamumu ne mua, ne tune mua na tahuna mu rata a naro kamumu na matane BAKOVI DAGI, a Vure ne mua.
26“Pali mu bole a maki ni gamai, mu bole lakea na tanga e BAKOVI DAGI i vulakia ne vona ni vasileki. 27Na tanga iea mu rata a nihabi ni gutu-vuro, mu gutu a bobona, a darana sipsip a bulmakau na dede ne BAKOVI DAGI a Vure ne mua. Na maka nihabi ranga, mu guru rike na dede a darana sipsip a bulmakau, pali a maka bobona mu kani. 28Mu ramai kamumu a maka vinara a taki mua vona pali, lakea a maka maki bara i bele kamumu ne mua, ne tune mua na tahuna mu rata a naro kamumu na matane BAKOVI DAGI, a Vure ne mua.
Naha Ni Ramai a Vure Ranga
29“E BAKOVI DAGI a Vure ne mua, bara i ratapile e huriki a tahotanga na tahuna mu dili na malala ne ria, muri bara mu bolea a malala mu made vona. 30Na tahuna a Vure i ratapile ria pali, mu matadoko, naha ni ramai a maka naro ni kavurike a vure ne ria. Naha ni nana maea, ‘E huriki i uka ma ria a Iuda, ri vasileki navai? Mia ranga mi gi vasileki manga ria.’ 31Na tahuna mu kavurikea e BAKOVI DAGI a Vure ne mua, naha ni kavurikea manga e huriki i uka ma ria a Iuda ri rata. Na tahuna ri kavurike a maka vure ne ria, ri rata a maka naro i muma hateka, e BAKOVI DAGI i marikoi vona. A naro tara ri ratea ri rabalaki e huriki e tune ria bakovi, e tune ria ngatavine, ri gutu na kanono, ge a nihabi na maka vure ne ria.32 d “Mu rata lobo a maka maki, ge manga a hini a taki mua vona. Naha ni hudo tala a vinara, naha ni lohopile na vinara.”
Copyright information for
BNP